Bro-Dreger a zo ur rannvro eus Breizh hag ac’h a eus Montroulez betek an Trev. Ar stêr-se ac’h a d’ober an harz etre Bro-Oueloù ha Bro-Dreger. Teir lodenn ac’h a d’ober Bro-Dreger. Graet e vez Treger-Izel eus ar parrouzioù hag a zo e Mervent Bro-Dreger, war-dro Montroulez, pa vez anvet Treger-Vras al lodenn a zo er C’hôrnog, war-dro Lannuon ha Landreger ha Treger-Vihan al lodenn a zo kostez Gwengamp. Gwechall gozh e oa Bro-Dreger un eskopti emren met staget eo bet eskopti Landreger ouzh eskopti Sant-Brieg da vare an Dispac’h. Bremañ eo disrannet Bro-Dreger etre departamant Penn-ar-Bed hag hini Aodoù-an-Arvor. Bro-Dreger hiziv-an-deiz a zo poblet gant un 200.000 a dud bennak.

Liesterioù

→ Al liesterioù en « où » pe « ioù » a vez lâret « o » pe « io » e tregerieg.

Da skouer, « gweleoù » a vez distaget « gweleo », « bagoù » « bago » hag all.

→ Cheñch a ra ar c’hensonennoù dent (z, d, t) alies pa vez ul liester en « o » pe « io ».

– « z » ac’h a da « j ». Da skouer : « miz » ac’h a da « mijio » (mizioù) el liester.

– « d » ac’h a alies a-walc’h da « j » ivez. Da skouer « Pred » ac’h a da « prejo » (predoù).

– « nt » ac’h a da « ñch » bepred. Da skouer « Hent » ac’h a da « heñcho » el liester.

Araogennoù

→ Eil stumm liester an araogennoù a vez distaget evit gerioù-zo : « -ac’h » e-lec’h « oc’h ». Da skouer : « ganac’h » e-lec’h « ganeoc’h ».

→ Trede stumm liester an araogennoù a vez distaget « e », e-giz e Bro-Wened. Da skouer « outo » ac’h a da « oute », « ganto » da « gante ».

→ An araogenn « da » a vez displeget ha distaget evel-se :

Displegadur	Distagadur
Din	Din
Dit	Dit
Dezhañ / Dezhi	Dañ pe Deañ / Dei
Dimp	Dimp
Deoc’h	Dac’h
Dezhe	Dê

→ An araogen « a » a vez displeget ha distaget evel-se :

Displegadur	Distagadur
Ac’hanon	Anon
Ac’hanout	Anout
Anezhañ / Anezhi	Anañ pe ‘Neañ / Anei pe ‘Nei
Ac’hanomp	Anomp
Ac’hanoc’h	Anoc’h
Anezhe	Anê pe ‘Nê

→ Araogennoù zo, evel : enep, a-dreñv, a-raok, a-dreuz, tost, dreist, a-us, etrezek… a vez displeget gant an araogenn « da » war-lec’h, kuit da vezañ displeget int-i o-unan. Da skouer : « Dreist dimp » e-lec’h « dreistomp ».

Displegañ verboù

→ Displeget e vez eil stumm al liester « -et » e-lec’h « -it » koulskoude. Da skouer « Karet ho mamm » (Karit ho mamm), pe « Komz a ret » (Komz a rit).

Ar verb Bezañ

→ En doare gourc’hemenn :

–	–
Bez / Be	Sois
Beet	Qu’il ou qu’elle soit
Beomp	Soyons
Beet	Soyez
Beent	Qu’ils ou qu’elles soient

→ En amzer dazont eo disheñvel an displegadurioù :

Bin	Bin
Bi	Bi
Bo	Bo
Bimp	Befomp
Beot	Befet
Bint	Befont / Boint

→ En amzer a-vremañ, stumm emañ, ne vez ket distaget e-giz e brezhoneg peurunvan

Emaon	‘h on
Emaout	‘h out
Emañ	Emañ
Emaomp	‘h omp
Emaoc’h	‘h oc’h
Emaint	Emaint

→ E Bro-Dreger e vez kavet ivez stummoù ar verb bezañ hep ar c’hemmadurioù pennañ evit respont d’ar goulennoù, pe pa vez implijet ar verb goude « mar », setu un nebeut skouerioù :

Goulenn	Respont
Ne oan ket gleb	Boas (Tu étais)
N’out ket fur ?	Gon (Je suis)
Ma’z e oan / Mard e oan	Mar boan (Si j’étais)
Ma’z on / Mard on	Mar gon (Si je suis)

Ar verboù

→ Ar verb mont a vez displeget gant « c’h » e-lec’h « y » pe « z ». Da skouer : « Ec’h an d’an emgann » e-lec’h « Ez an d’an emgann », pe « Me ac’h a » e-lec’h « Me a’z a » pe « Me a ya ».

→ Alies a-walc’h ec’h a an « e » da « i » e verboù zo, padal e chom an adanor e « e » an darn vrasañ eus an amzer. Un nebeut skouerioù :

Debriñ	Dibri	Debret
Berviñ	Birvi	Bervet
Krediñ	Kridi	Kredet
Kreskiñ	Kriski	Kresket
Pediñ	Pidi	Pedet
Degemer	Digemer	Digemeret

Ar verb Gouzout (Goût)

→ En amzer a-vremañ eo standart a-walc’h an traoù, met distaget e vez an amzerioù all gant ar b.v. « gwi ».

Amzer a-vremañ	Amzer dremenet
Gouzon	Gwien
Gouzout	Gwies
Goar	Gwie
Gouzomp	Gwiemp
Gouzoc’h	Gwiec’h
Gouzont	Gwient

Dibarderioù

→ Ne vez ket graet bepred ar c’hemmadur d > z, neuze e vez lâret : « Ar sizhun a deu »

→ Gerioù dibar o distagadur :

Eo	Ê	Bras ê an delwenn
Hiziv	Hirie	Braw ê an amzer hirie
Erruiñ	Ay	Ay ê skuiz gantañ

→ « eu » pe « e » a c’hall bezañ distaget « o » e gerioù zo evel :

Bep	Bop
Seurt	Sort
Bepred	Bopred
Peseurt	Pesort
Memes	Momes